ဆောင်းရာသီဘွဲ့ ပိုဒ်စုံရတု
မနွဲ့ချစ်ခင်၊ သို့ကိုစင်လျက်၊
သခင်ဘယ်ကြောင့်၊ အလွမ်းနှောင့်၍၊
မဖြောင့်ရှိလျက်၊ လကိုတွက်မူ၊
ဝါရက်ကုန်ကျွန်း၊ ဗြိစ္ဆာလှမ်းက၊
ဆန်းတန်ဆောင်မုန်း၊ ချမ်းစိမ့်တုန်းဝယ်၊
မိုးလုံးထိန်ဝါ၊ ကြတ္တိကာလျှင်၊
ယှဉ်လာစမြဲ၊ ပန်းခဝဲတို့၊
ခါပွဲချိန်သင့်၊ ညီစေပွင့်သို့။ ။
ထပ်ဆင့်နတ်တော်၊ ဆန်းလာပေါ်က၊
မပျော်ယခု၊ ချမ်းသာလု၍၊
ဓနုရာသီ၊ မိုးတိမ်ဆီဝယ်၊
မိဂသီလျှင်၊ ရောင်မြူးရွှင်သော်၊
သဇင်ပွင့်ခိုင်၊ တောလုံးကြိုင်မျှ၊
ဂနိုင်ထိုထို၊ မြို့လုံးစိုက။ ။
ပြာသိုမကာရ၊ ဆန်းသည်မှကား၊
ဖုသျှကြယ်နှင့်၊ ခန့်တော်သင့်၍၊
ပွင့်ခွာညိုနွယ်၊ ရိုးတန်သွယ်နှင့်၊
မိုးလယ်ဝေမှုံ၊ နှင်းဖုံဖုံနှင့်။ ။
ကုံရာသီထဲ၊ တပို့တွဲကို၊
ပေါက်လဲပွင့်စ၊ ကြယ်မာဃတို့၊
ရွှေလဘုံနန်း၊ ယှဉ်ပြိုင်သန်း၍
ချမ်းမကုန်သေး၊ နောင်ချည်းကွေးသည်။ ။
ဧမြဟေမန်ကြူးတော့သည်။
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |