ပေါက်ပင်
ရွက်ဝိုင်းရှင်ရှင် ခက်လက်ခွင်
ပေါက်ပင်ဘာကြောင့် ကိုင်းရတယ်။
ပေါက်ပင်ကိုင်းကိုင်း ညိုမှိုင်းမှိုင်း
ငွေဗျိုင်းနားလို့ ကိုင်းရတယ်။
ပေါက်ပင်ကိုင်းကိုင်း ညိုမှိုင်းမှိုင်း
ငွေဗျိုင်းဘာကြောင့် နားရတယ်။
ပေါက်ပင်မြစ်ဖျား ရေစပ်နား
ရွှေငါးပေါ်လို့ နားရတယ် ။
ပေါက်ပင်မြစ်ဖျား ရေစပ်နား
ရွှေငါး ဘာကြောင့် ပေါ်ရတယ်။
ရွှံ့ညွှန်မည်းမည်း ရေညိုထဲ
ငွေကျွဲလူးလို့ ပေါ်ရတယ်။
ရွှံ့ညွှန်မည်းမည်း ရေညိုထဲ
ငွေကျွဲဘာကြောင့် လူးရတယ်။
စုစုအုပ်အုပ် ပွေရှုပ်ရှုပ်
ရွှေဖြုတ်ကိုက်လို့ လူးရတယ်။
စုစုအုပ်အုပ် ပွေရှုပ်ရှုပ်
ရွှေဖြုတ်ဘာကြောင့် ကိုက်ရတယ် ။
မြည်ဟည်းထစ်ကြိုး သံစုံနှိုး
ငွေမိုးရွာလို့ ကိုက်ရတယ်။
မြည်ဟည်းထစ်ကြိုး သံစုံနှိုး
ငွေမိုးဘာကြောင့် ရွာရတယ်။
ရေအိုင်ကမ်းပါး မြေပပ်ကြား
ရွှေဖားအော်လို့ ရွာရတယ်။
ရေအိုင်ကမ်းပါး မြေပပ်ကြား
ရွှေဖားဘာကြောင့် အော်ရတယ်။
ဟိုမွှေသည်မွှေ ရပ်တိုင်းမွှေ
ရေမြွေကိုက်လို့အော်ရတယ်။
ဟိုမွှေသည်မွှေ ရပ်တိုင်းမွှေ
ရေမြွေဘာကြောင့် ကိုက်ရတယ်။
ငါ့ဝမ်းပူဆာ အစာရှာ
မနေသာလို့ ကိုက်ရတယ်။
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |