မိန်ရာသီ တပေါင်းလဘွဲ့ ညည်းချင်း (၁)
အော် - ဂိမှာန်အတာ၊ ချိန်အခါကို၊
စိန်ကြာညောင်လွ၊ ရောင်ကြိုးကြွမှာ၊
အလှငယ်ထူးချွန်
သုံးရွေ့မှူး၊ ကြော့ကြူးလွန်တို့
လွမ်းဝှန်ငယ်ရှည်ပြန့်
ဆည်မတံ့အောင်၊
ငွေနားပန့်ရှင်၊ တောင်မီးခင်လဲ
မနှင်ထွန်တိုက်၊ ချွန်စူးငယ်စိုက်လို့
အလိုက်ကယ်စာရေ၊
စဉ်မျိုးဆက်လာ၊ ကြက်ရိုးစာနှင့်
ဘာသာငယ်ပွေသည်
ခေါင်ရေပျော်ပွဲ ဖွဲ့ကြတယ်။
တံငါလောင်းလှေ၊ တပုံတသီး
တောင်တင်တီးလို့၊ ယဉ်စီးငယ်တွေသည်
ကြည်ရေညိုလဲ့ စိမ်းမြတယ်။
ပြဘင်္ကရု၊
ဖန်နေနန်းလည်း၊ ပြင်ခန်းလုမို့
ဖဂ္ဂုမာသံ၊ လအဖန်ကို
ဘယ်ဉာဏ်ပိုင့်ရှင်၊ မလွမ်းအောင်ဆင်ပါ့မယ်။
လေးချိုးသဖြန်
ရှစ်ခွင်တိုင်း၊
မှုန်မှိုင်းတဲ့ပတ်လည်။
သဇင်ကြွင်းငယ်နှင့်
အင်ကြင်းသန္တာညွန့်ငယ်တို့
ဖူးညွန့်ကိုက်စည်။
ဘမရာရွှေပိတုံးငယ်တို့
ခြွေသုံးကြဝတ်ရည်
ညွတ်ကြည်ဘွယ့်ဖော်ကွဲ။
ယင်းသည့်နေ့ဆိုင်
ရသေ့သူတော်တိုင်မှ
ဉာဏ်မခိုင် စျာန်ယိုင်ဘဲလျှောရတယ်
ရာသီတွင်စာညီပြောပေပ
ကြော၍သာမြဲ။ ။
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |