မိဿရာသီ တန်ခူးလဘွဲ့ လူးတား
ပျော်မြူးရာသီ၊ ဖူးစီသရစ်၊
ရွက်သစ်ဖြန်းစ၊ လန်းလှလေ။ ။
တေဇောဓာတ်အိမ်၊ နွေဂိမ္မန္တ၊
တံခူးလဟု၊ စရရာသီ၊
နာရီညဉ့်နေ့[၁]၊ မျှ၍တူညီ၊
သုံးဆယ်စီတည့်၊ အသဝဏီကြယ်၊
နေနှင့်ဆွယ်လျက်၊ ညဉ့်ဝယ်စိတြ၊
သော်တာလနှင့်၊ လှည့်ကြမချွတ်၊
ကေဝဋ်တာရာ[၂]၊ ယှဉ်ပြိုင်လာသား၊
အတာသဘင်၊ သည်ပွဲတွင်၌၊
ကေရှင်ညွန့်လန်း၊ နှင်းရည်ဖျန်းလျက်၊
ဖော့ပန်းမတူ၊ ဖလ်နန်းသူတို့၊
ဟန်ယူပျောင်းပျောင်း[၃]၊ ရွှေဖယောင်းသို့၊
မွှေးပေါင်းနံ့သာ၊ စမ္ပါအကျော်၊
ကန့်ကော်ရင်ခတ်၊ ပွင့်ဝတ်မြိုင်ခြေ[၄]၊
တောင်လေညင်းညင်း၊ ရစ်လှာသွင်းသော်၊
ရင်တွင်းငြိမ့်လေး၊ ဆိတ်ရုံဧ၏[၅]၊
ငယ်သွေးလဲ့ပြာ၊ မောနှင့်သာလျှင်၊
မေတ္တာမပျက်၊ လွန်းကြင်ငှက်သို့၊
သံမြွက်မွှေးကြိုင်၊ ဂူရွှေလှိုင်တွင်၊
တူပြိုင်ဆုတောင်း၊ ညောင်ရေလောင်းသည်။ ။
မွှေးပေါင်းနံ့သာရည်နှင့်လေ။ ။
စက်ခြည်တည့် နှစ်သိန်း ငါးသောင်းကိန်း[၆]။
တြိန်းဘဝါးမှန်။ ။
ဂိမှန်တည့် တံခူး သာဆန်းထူး[၇]။ ။
နှစ်ဦးမိဿခွင်။ ။
သဘင်တည့်ပျော်မြဲ အတာပွဲ။ ။
မှတ်ချက်
[ပြင်ဆင်ရန်]- ↑ တန်းခူးလဟု၊ စိတြခေါ်မှီ၊ နာရီညဉ့်နေ့ [ဟ] [မ]
- ↑ ကေဝဋ်တာရာမှ၊ တောလေညှင်းညှင်း အထိ (ဟ-မူတွင် စာများကျနေသည်။)
- ↑ ဟန်ယူပျော့ပြောင်း [ဘ]
- ↑ ပန်းမြတ်လျှံဝေ [ဟ]
- ↑ စိမ့်ရန်အေး၏ [ဘ]။ ချမ်းတုန်ဧ၍ [ဟ]။
- ↑ စက်ခြည်တည့်နှစ်သိန်း ငါးသောင်ကိန်း။ ဟူ၍ [ဘ] မူ၊ [ဟ] မူတို့တွင် ရှိသည်။ မြန်မာစာညွန့်ပေါင်းတွင်မူ ဦးကျော်ဒွန်းက နှစ်သိန်းငါးသောင်းဖြစ်သင့်သည်ဟု မှတ်ချက်ချထားသည်။
- ↑ တြိန်း ဘဝါးမှီ၊ ဂိမှီတည့်တံခူး သာဆန်းထူး [ဘ]
- မူရင်း - ရေနံချောင်း တွင်းစားကြီးဦးဘိုးဂုဏ် လက်ရေးမူ
- [ဟ] - ဟံသာဝတီပုံနှိပ်တိုက်၊ ရန်ကုန်မြို့၊ ၁၉၀၇-ခုနှစ်ထုတ် စာအုပ်မူ
- [မ] - မြန်မာစာညွန့်ပေါင်းကျမ်း၊ တတိယတွဲမူ
- [ဘ] - ဘားနတ်ပိဋကတ်တိုက်ပေမူ၊ ရန်ကုန်မြို့
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |