သိမ်မျိုးစုံမဟာဋီကာ/ပိုလ်အရ နာနာဝါဒ ဝိစာရဏ ပြခန်း

by ကျွန်းရွာတောရဆရာတော်

     ဥက္ကဋ္ဌပရိစ္ဆေဒအားဖြင့် ခုနစ်တောင့်ထွာရှိသော ဆင်ပမာဏ အောက်ငယ်သော။ ဩမကပရိစ္ဆေဒအားဖြင့် (၄ိ)ကို တစ်ပိုလ် ဆိုသည်။ ၎င်းပိုလ်ပေါင်း (၃၂ )ပိုလ်။ မာဂဓကျပ် (၁၂၈ိ)၊ တစ်ရာနှစ်ဆယ့်ရှစ်ကျပ် အင်္ဂလိပ်ကျပ် ၁၅၁ိ ၊ ၇-ပဲနှင့် သုံးစိတ်နှစ်စိတ် မြန်မာကျပ်အားဖြင့် (၁၀၆ိ ၇ူး ​ေ၂ ွး )တစ်ပိဿာ၊ ခြောက်ကျပ်၊ ခုနစ်မူး၊ နှစ်ရွေးဖြင့် ချိန်အပ်သော ထိုတင်လဲခဲနှင့် သဏ္ဌာန်ပမာဏ တူမျှသော ကျောက်တုံးကျောက်ခဲသည်၊ သံမြှုပ်ခဲ,သံတွေခဲ စသည်ဖြင့်ပြီးသော ကျောက်ဖြစ်စေကာမူ ကျောက်နိမိတ်လောက်၏၊ ကျောက်နိမိတ် ကြားရ၏။ ထို(၃၂ )ပိုလ် တင်လဲခဲပမာဏ ယခုကာလ အယူဝါဒများ၏။ ပိုလ်အရကိုလည်း၊ ရှေးအခါက ဝါဒကွဲပြားကြ၏။ (၄ိ)=တစ်ပိုလ်ဟု ဆိုသောစကားသည် အသင့်ဆုံးဖြစ်၏။ ကြွင်းသောဝါဒများကား အာဂုံယုတ္တိမရှိ၊ ရမ်း၍ဆိုကြသော စကားချည်းသာ ဖြစ်ကြ၏။ ထို ကြောင့် အမရကောသ အဘိဓာန်၌

     ဂုဉ္ဇာပဉ္စာဒျမာသကော၊ တေ သောဠသက္ခော ကဿောထီ ပလံ ကဿ စတုတ္ထယံ ဟု မိန့်၏။

     ပဉ္စဂုဉ္ဇာ၊ ငါး,ချင်ရွေးတို့သည်။ အာဒျမာသကော၊ အာဒျမာသက မည်၏။ တေ သောဠသ၊ ထိုတစ်ဆယ့်ခြောက်ပဲတို့သည်။ အ​က္ခော၊ တစ်အက္ခ,တစ်ကျပ်,တစ်သစ်ဆိမ့်သီးမည်၏။ ဝါ၊ တစ်ကဿမည်၏။ အထီ၊ ပုံးလိင် နပုလ္လိင်တည်း။ ကဿ စတုတ္ထယံ၊ အက္ခလေးခုဟူသော လေးကျပ်သည်။ ပလံ၊ တစ်ပိုလ်မည်။

လီလာဝတီဂဏန်းကျမ်း၌လည်း -
     ဒသဍ္ဎဂုဉ္ဇံ ပ၀ဒန္တိ မာသံ၊ မာသဝှယေ သောဠသဘိ စ ကဿံ ကဿေ စတုဗ္ဘိ စ ပလံ တုလညာ -ဟု လာ၏။

     ဒသဍ္ဎဂုဉ္ဇံ၊ ငါး,ချင်ရွေးကို။ မာသံ၊ တစ်ပဲဟူ၍။ တုလညာ၊ ချိန်လိမ္မာသိ ပညာရှိတို့သည်။ ပ၀ဒန္တိ၊ မိန့်ဆိုကုန်၏။ သောဠသဘိ စ မာသဝှယေ၊ တစ်ဆယ့်ခြောက်ပဲတို့ဖြင့်။ ကဿံ၊ တစ်ကဿ-တစ်ကျပ်ဟူ၍။ ပဝဒန္တိ၊ မိန့်ဆိုကုန်၏။ စတုဗ္ဗိစ ကဿေ၊ လေးကဿ-လေးကျပ်တို့ဖြင့်။ ပလံ၊ တစ်ပိုလ်ဟူ၍။ ပဝဒန္တိ၊ မိန့်ဆိုကြကုန်၏။(ဤသို့အနက်သမ္ဗန်)

     ပလံ ကဿ စတုက္ကံ၊ တန္တု သတ္ထေ တောလစတုက္ကံ၊ ဝေဇ္ဇကေ အဋ္ဌတောလကံ၊ လောကိကေ သဋ္ဌရတ္တိ ဒွိမာသတော လတ္တယံ။ (ကပ္ပဒုမ။)

     ယင်း ကပ္ပဒုမ၊ သဒ္ဓတ္ထထောမမဟာနိဓိ၊ မုတ္တာဝလိ၊ ဝါစပ္ပတိ အဘိဓာန်တို့၌လည်း ရွေးငါးရွေးကို တစ်ပဲ၊ တစ်ဆယ့်ခြောက်ပဲကို တစ်ကဿ,တစ်ကောလ,တစ်ကျပ်၊ ယင်းတစ်ကျပ်မှာ ရွေးပေါင်း ရှစ်ဆယ်၊ လေးကျပ်ကို တစ်ပိုလ်ဟု ပြကြ၏။ သင်္ချာပကာသကကျမ်း၌လည်း-

          မာဂဓိကတုလာယေဝ၊ ကလဉ္စံ ပဉ္စဝီသတိ။
          ခုဒ္ဒကဂုဉ္ဇကာနံ တံ၊ ဒွတ္တိံသကန္တိ အပရေ။

     မာဂဓိကတုလာယေဝ၊ မာဂဓချိန်ဖြင့်သာလျှင်။ ခုဒ္ဒကဂုဉ္ဇကာနံ၊ ရွေးငယ်တို့၏။ ပဉ္စဝီသတိ၊ နှစ်ဆယ့်ငါးရွေးသည်။ ကလဉ္စံ၊ တစ်,ကလဉ္စမည်၏။ တံ၊ ထိုကလဉ္စသည်။ ဒွတ္တိံသကံ၊ ရွေးငယ်သုံးဆယ်နှစ်ရွေးရှိ၏။ ဣတိ၊ ဤသို့။ အပရေ၊ တစ်ပါးကုန်သော ဆရာတို့သည်။ ဝဒန္တိ၊ ဆိုကြကုန်၏။

     ဤသို့ ကလဉ္ဇတစ်ခုသည် သုံးဆယ့်နှစ်ရွေးရှိကြောင်းပြ၏။ ကင်္ခါ ဋီကာသစ် (၁၃၉)၌ -

        ဧကပလံ နာမ ဒသကလဉ္ဇန္တိ ၀ဒန္တိ -

ဟု ဆို၏။ ကလဉ္ဇ ဆယ်ခုသည် တစ်ပိုလ်ဖြစ်၏ဟု ပြသဖြင့် ကလဉ္ဇ ဆယ်ခုသော် ရွေးပေါင်း (၃၂၀)ရှိ၏။ တစ်ကျပ်၏ ရွေးပေါင်း ရှစ်ဆယ်နှင့်စား။ လဒ်လေးကျပ်ရ၏။ လေးကျပ် တစ်ပိုလ်ဟု ဆိုသောကျမ်းဟူသမျှနှင့် ကင်္ခါဋီကာသစ်စကား တစ်ထပ်တည်းကျ၏။ ထို့ကြောင့် ကင်္ခါ ဋီကာသစ်၌ - ဒသ ကလဉ္ဇံ၊ ကလဉ္ဇ ဆယ်ခုသည်။ ဝါ၊ သုံးဆယ့်နှစ်ရွေးရှိသော ကလဉ္စတို့၏ ဆယ်ခုသည်။ ဧကပလံ နာမ၊ တစ်ပိုလ်မည်၏-ဟူ၍ အနက်ပေး။

     ရှေ့အခါ၌ မာဂဓကျပ် ပိုလ်စသည်ကို သေသေချာချာ သိနိုင်လောက်အောင်ပြသော သာသနာတော် ကျမ်းဂန် တိုက်ရိုက်မရှိ သေသေချာချာပြသော လောကီကျမ်းဂန်များလည်း မြန်မာနိုင်ငံသို့ မရောက်သေးသဖြင့် ကျမ်းဂန်တတ်အကျော် ဆရာတော်ဘုရားများပင် အနုမာနဉာဏ်ဖြင့် ရမ်းဆ၍ ယူတော်မူကြရသတည်း။ ယူတော်မူကြပုံကား ကင်္ခါနိဿယတစ်စောင်၌- ဧကံ ပလံ နာမ ဒသကလဉ္စံ -ဋီကာလာရကား ကျပ်(၁၀) တစ်ပိုလ်ဟု မှာထား၏။ ရွှေဥမင်ဆရာတော်ရေး ဝိနည်းမဟာဝါ အဋ္ဌကထာနိဿယ၌ တစ်ပိုလ်လျှင် ကျပ်(၄၀) သုံးဆယ့်နှစ်ပိုလ်သော် တစ်ဆယ့်နှစ်ပိဿာနှင့် အကျပ်ရှစ်ဆယ်ရှိ၏။ ဆရာတို့ကား ဒွတ္တိံသပလအရ သုံးဆယ့်နှစ်ပိဿာ နှင် နှင်ဟု မှာတော်မူ၏။ တစ်ပိဿာကို တစ်ပိုလ်ယူသည်။ အရှင်အရိယဝံသဓမ္မသေနာပတိ ရေးအပ်သော ဇာတ်ဝိသောဓန၌လည်း ကျပ်လေးဆယ်ကို တစ်ပိုလ်ဟူ၍ပင်ပြ၏။
တောင်ဖီလာရေး သီမဝိနိစ္ဆယ၌ကား ကျပ်(၁၀) တစ်ပိုလ်ယူ၏။ ငါတို့ကျေးဇူးရှင် ကျီဝန်ဆရာတော်ကား တစ်ပိုလ် ကျပ်တစ်ဆယ် ဆယ်ပိုလ် တစ်ပိဿာ (၃၂) ပိုလ်မှာ သုံးပိဿာ နှစ်ဆယ်ရ၏။ ဝိနည်းမဟာဝါ ဆင်တဲဂဏ္ဌီ၌လည်း ကလဉ္စတစ်ခု ကျပ် (၁ဝ)ဖြစ်၍ တစ်ပိုလ် တစ်ပိဿာ၊ (၃၂)ပိုလ်လျှင် (၃၂) ပိဿာရှိကြောင်းပြ၏။

     ဤသို့ စသည်ဖြင့် ထိုအခါ တောင်း,တင်း,ချင်ကွက်နှင့်တူသော ကျမ်းဂန်များ မတွေ့ရသည်အတွက် ဧရာမပညာရှင် ဘုန်းရှင် သမ္ဘာရှင်ကြီးတွေလျက် မှားမှားယွင်းယွင်း ရေးကြရသေးလေသည်။ ထိုသို့လျက် အမှားကြိုက်သော မန္ဒဗုဒ္ဓိတို့က ချင့်တောင်းဖြင့် မချိန်။ လက်ရမ်းဆ၍ ပေးအပ်သော ဆရာတို့ကို ထုတ်ပြ၍ သကဝါဒအားဖြင့် ယူကြတုန်းရှိသေးသည်ကား ဧရာမ အံ့ဩဖွယ်ရာကြီး ပါတကားဟု စဉ်းစားတိုင်း ရေးရေး ပေါ်လာလိမ့်မည်တည်း။ ဤသို့ပင် ငါတို့နှင့်တကွ အမှန်အကန် လိုလားကြသော ဇမ္ဗူဒီပါ တစ်ကျွန်းလုံးရှိ ပညာရှိ ပညာကျော် ကျမ်းဂန်တတ် ပုဂ္ဂိုလ်ကျော်ဟူသမျှတို့သည် ငါတို့ ကျေးဇူးတော်သခင် ထိပ်ခေါင်တင် ဖြစ်တော်မူသော ပဏ္ဍိတဓဇ သိရီပဝရ မဟာဓမ္မရာဇာဓိရာဇဂုရု မြန်မာရေမြေ့ရှင်၏ တတိယ ဘွဲ့တံဆိပ်တော်,ရ မိုင်းခိုင်းဆရာတော်ဘုရားကြီး ရေးသားတော်မူအပ်သော ပလပတ္ထာဒိဝိနိစ္ဆယကို တွေ့ကြရ မြင်ကြရ ကြည့်ရှု ကြရသဖြင့် အမှန်အကန်ပင် ယူတော်မူကြလေကုန်သတည်း။ ဤကား ကျောက်နိမိတ် အကျဉ်းချုပ် လိုရင်းများပေတည်း။
     
     ဒွတ္တိံသပလာဋီကာ သမတ္တာ။