ပမတ္တာပမတ္တဒွေသဟာယကဝတ္ထုဂါထာ
ပထမကျော်၊ သာသနဓဇသိရီပဝရ ဓမ္မာစရိယ ဒေါ်ဝိဇ္ဇေသီ၏ သရုပ်ပြဓမ္မပဒကျမ်း
၆ - ပမတ္တအပ္ပမတ္တဒေသဟာယကဝတ္ထု
၂၉။ အပ္ပမတ္တော ပမတ္တေသု၊ သုတ္တေသု ဗဟုဇာဂရော။
အဗလဿံဝ သီဃဿော၊ ဟိတွာ ယာတိ သုမေဓသော။
ဤတရားဒေသနာတော်ကို ဘုရားရှင်သည် သာဝတ္ထိပြည် ဇေတဝန်ကျောင်းတော်၌ သီတင်းသုံးနေတော်မူစဉ် ထက်သန်သော လုံ့လဝီရိယဖြင့် တရားအားထုတ်၍ ရဟန္တာဖြစ်သော ရဟန်းနှင့် မေ့မေ့လျော့လျော့နေသော မိတ်ဆွေရဟန်းတို့ကို အကြောင်းပြု၍ ဟောတော်မူသည်။
ဒေသနာတော်၏ အဆုံး၌ များစွာသော ပုဂ္ဂိုလ်တို့ သောတာပန်စသည် ဖြစ်ကြသည်။
အနက်
သီဃဿော၊ လျင်မြန်သော မြင်းသည်။ အဗလဿံ၊ ခွန်အားနည်းသော မြင်းကို။ ဟိတွာ၊ စွန့်ထား၍။ (ဝါ) ချန်ထား၍။ ယာတိ ဣဝ၊ သွားသကဲ့သို့။ အပ္ပမတ္တော၊ မမေ့မလျော့သော။ သုမေဓသော၊ ပညာရှိသည်။ ပမတ္တေသု၊ မေ့လျော့သူကို။ ဟိတွာ၊ စွန့်ထား၍။ (ဝါ) ချန်ထား၍။ ယာတိ၊ သွား၏။ ဗဟုဇာဂရော၊ နိုးကြားခြင်း များသောသူသည်။ သုတ္တေသု၊ အိပ်ပျော်သူတို့ကို။ ဟိတွာ၊ စွန့်ထား၍။ ယာတိ၊ သွား၏။
စကားပြေ
အားရှိ၍ လျင်မြန်သော မြင်းသည် အားနည်း၍ ပိန်သော မြင်းကို ချန်ထားခဲ့ပြီး သွားသကဲ့သို့ မမေ့မလျော့သော ပညာရှိသည် မေ့လျော့သူကို နိုးကြားမှု များသော သူသည် အိပ်ပျော်သူကို ချန်ထား၍သွားသည်။
အပ္ပမတ္တော— အရ အပ္ပမာဒ (သတိ) နှင့် ပြည့်စုံသော ရဟန္တာ ရ၏။
ပမတ္တေသု— အရ သတိလွတ်ကင်းသော ပုဂ္ဂိုလ် ရ၏။
သုတ္တေသု— အရ သတိကင်းလျက် ဣရိယာပုထ် လေးပါးလုံး အိပ်ပျော်နေသူ ရ၏။
ဟိတွာ ယာတိ— အာဂုံအားဖြင့်လည်းကောင်း၊ လောကုတ္တရာတရား ၉-ပါးဟူသော အဓိဂမအားဖြင့်လည်းကောင်း ချန်ထား၍သွားသည်။
ပါဠိသဒ္ဒါခက်ဆစ်
ဗဟုဇာဂရော = ဗဟု (ဇာဂရော) ယဿာတိ ဗဟုဇာဂရော။ ဗဟု + ဇာဂရ + ယ။
သီဃဿော = သီဃသော အဿော သီဃဿော။ သီဃ + အဿ။
ပမတ္တာပမတ္တဒေသဟာယကဝတ္ထု ပြီး၏။
အရှင်သုဇနာဘိဝံသ၏ ဓမ္မပဒဂါထာနိဿယ
၂-အပ္ပမာဒဝဂ်
၆-ပမတ္တာပမတ္တဒွေသဟာယကဝတ္ထုပါဠိဂါထာ
အဗလဿံဝ သီဃဿော, ဟိတွာ ယာတိ သုမေဓသော။
သီဃဿော၊ အားအင်စိတ်မာန်, ဇွဲသန်သန်ဖြင့်, လျင်မြန် ဖျတ်လတ်, မြင်းကောင်းမြင်းမြတ်သည်။ အဗလဿံ၊ ချည့်နဲ့ပိန် ဖျင်း, အားမရှိသောမြင်းကို။ ဟိတွာ၊ ခရီးအဓွန့်, ပယ်ခွာစွန့်၍။ ယာတိ ဣဝ၊ လိုရာထုတ်ချောက် ရောက်နိုင်သကဲ့သို့။ (ဧဝံ၊ တူ။ သတ္တေသု၊ သူသူငါငါ, သတ္တဝါဟူသမျှတို့သည်။) ပမတ္တေသု၊ မေ့ လျော့ပေါ့ဆ, နေထိုင်ကြကုန်လသော်။ အပ္ပမတ္တော၊ မမေ့မလျော့ မပေါ့မဆသော။ သုမေဓသော၊ ကောင်းမြတ်စွာဘိ, ပညာရှိသည်။ ဟိတွာ၊ လောကသံသရာ, ၂-ဖြာအဓွန့်, ပယ်ခွာစွန့်၍။ ယာတိ၊ အထက်တန်းပေါက်, နိဗ္ဗာန်ရောက်အောင်, ထုတ်ချောက်မသွေ, သွားနိုင်ပေ၏။ (သတ္တေသု၊ တို့သည်။) သုတ္တေသု၊ သတိကင်းရိပ်, အပျင်းစိတ်ဖြင့်, အိပ်၍နေကုန်လသော်။ ဗဟုဇာဂရော၊ သတိ တရား, အမြဲထား၍, များသောနိုးကြားခြင်းရှိသော။ သုမေဓသော၊ သည်။ ဟိတွာ၊ ၍။ ယာတိ၊ ၏။ (ပါ-၂၉)
ပမတ္တာပမတ္တဒွေသဟာယကဝတ္ထုဂါထာနိဿယပြီးပြီ။