ဗြိစ္ဆာရာသီ တန်ဆောင်မုန်းလဘွဲ့ လူးတား
နှင်းဖွဲ့မှိုင်းရီ၊ ရာသီဗြိစ္ဆာ၊
ကွေးလာမလုံ၊ လွှမ်းခြုံချမ်းစ၊
လွမ်းလှလေ[၁]။ ။
တိမ်ခြေရစ်သန်း၊ မင်းလွင်ဖျန်း၍၊
စက်ခန်းသုံးသိန်း၊ ဓာတ်ကိန်းအာပေါ၊
ကျယ်ပြောတိန[၂]၊ သို့သည့်လကို၊
မာသ ဗြိစ္ဆာ၊ နေ့မှာနာရီ၊
စွန်းညီအပြား၊ ရှစ်ခုသား၍၊
ရင်းအားနှစ်ဆယ်[၃]၊ ညဉ့်ဝယ်ဗီသ၊
တြိန္နနှင့်၊ ထွန်းပနက္ခတ်၊
ငွေပြဿာဒ်နှင့်၊ ကြယ်ကြိတ္တိကာ၊
ကျီးတာရာတို့၊ ပြည့်လှာကုန်ကျ၊
ဂြိုဟ်သူရနှင့်၊ ညီမျှတူစွာ၊
ဝိသာခါလျှင်၊ နေ့မှာ လှည့်သွား၊
ဘဝါးစတု၊ ချမ်းစပြုသား၊
ငွေဥစိုစို၊ မိုးလုံးညို၍၊
မောက်မိုဖြိုးမြင့်၊ ရွှေပွင့်ခဝဲ၊
ဝတ်မှုံကြဲလျက်၊ ထွတ်ကဲစိန္တေ၊
ရှင်တော့်မွေကို၊ ရိုသေညွှတ်ကျိုး၊
မသိုးသင်္ကန်း၊ လှူဒါန်းရောင်ရှိန်[၄]၊
ကထိန်ပွဲခင်း၊ ကြိုင်သင်းပန်းမာလ်၊
ဆုပန်မြွတ်ဟ၊ သံချိုမြနှင့်၊
အလှပြောင်းအိ၊ သတိရွှေသား၊
သည်အလားသို့၊ ငါးပါးအင်စုံ၊
ဆူကြုံနိမ့်မြင့်၊ ပြစ်မျိုးလွင့်လျက်[၅]၊
မြပွင့်စိမ်းနီ၊ ပြာရီရောင်စု၊
ကျီးဥလိုလို[၆]၊ ယဉ်ပျိုနုနယ်၊
နတ်နှင့်ဆွယ်သို့၊ လည်ဝယ်ရွှေညှင်း၊
လဲ့ဝင်းပြာဖြူ၊ ဟန်ယူယိမ်းနွဲ့၊
ခဝဲပွင့်တုန်း၊ တန်ဆောင်မုန်းဟု၊
ခွေနှုန်းခန်းလယ်၊ ဇာခြယ်အုံးပေါ်၊
မွှေးပေါင်းဖျော်၍၊ (ကြင်ဖော်မစုံ၊
ပိုက်ခြုံကွာဝေး၊ ခြူးကွေးဝန်းယှက်၊
လယ်ဗွေထက်၌၊ မြရွက်ကေသာ၊
လွမ်းမူရာနှင့်၊ သန္တာညွန့်သစ်၊
သရစ်ပေါ်ဖူး၊ လျှပ်ရောင်မြူးလျက်၊
ဆောင်းဦးဆည်းဆာ၊ လေပြေလာ၍)[၇]၊
သောကြာရပ်က၊ ဆွတ်ဖျန်းပြသော်၊
မြိုင်ဝပတ်လည်၊ ပင်တိုင်းစည်လျက်၊
သံမြည်ရင့်ကျူး၊ ကျေးငှက်မြူးသား၊
ဆန်းထူးဝေဝေ၊ မြောက်လေသွင်းချီ၊
ရာသီဗြိစ္ဆာ၊ လမှာတန်ဆောင်၊
မြူမှောင်မသန်း၊ သော်တာဆန်းသည်။ ။
တိမ်ပန်းထက် ကောင်းကင်ကလေ။ ။
စင်ကြယ်တည့် ညစ်ကြေး မြူမထွေး။ ။
ချမ်းအေးမိမယ်ကို။ ။
ဘုန်းမိုမှာပျော်ဘဲ မယ်ဝမ်းနဲ[၈]။ ။
နှင်းပွဲဝန်းလည်ဝေ။ ။
သည်းကြွေတည့် တုန်ချမ်း မျှော်မိလွမ်း။ ။
မှတ်ချက်
[ပြင်ဆင်ရန်]- ↑ နှင်းဖွဲ့မှိုင်းရည်၊ ရာသီဗြိစ္ဆာ၊ ဘော်ကွာတုန်ချမ်း၊ လွှမ်းလို့မလုံ၊ ခြုံသော်ဧမြ၊ ဆွေးရလေ (မ) (ဟ)
- ↑ မှာကိန်းအာပေါ၊ ကျယ်ပြောထိရ (မ)။ မှာကိန်းအာပေါ၊ ကျယ်ပြောဒိန (ဟ)။
- ↑ စွန်းညီအပြား၊ ရှစ်ခုထား၍၊ နောက်ကားနှစ်ဆယ် (မ) (ဟ)။ စွန်းညီအဖျား၊ ရှစ်ခုထား၍၊ နေ့အားနှစ်ဆယ် (ဘ)။
- ↑ မညှိုးသင်္ဃာ၊ လှူဒါရောင်ရှိန် (မ) (ဟ)
- ↑ မြင်တိုင်းတင့်လျက် (မ) (ဟ)
- ↑ ပြာရီရောင်စို၊ ကျီးဥလိုနှင့် (မ) (ဟ)
- ↑ မွှေးပေါင်းဖျော်၍၊ သွင်းဆော်လေညာ၊ သောကြာရပ်က (မ) (ဟ) မူတွင် ဤမျှသာရှိသည်။ ကွင်းပိုဒ်စကား မပါ။
- ↑ အုံးမှီမှာပျော်ဘဲ မယ်ဝမ်းနဲ (ဘ)။ လွမ်းပိုလို့ဖော်ကွဲ မယ်ဝမ်းနဲ (မ) (ဟ)
- မူရင်း - ရေနံချောင်း တွင်းစားကြီးဦးဘိုးဂုဏ် လက်ရေးမူ
- [ဟ] - ဟံသာဝတီပုံနှိပ်တိုက်၊ ရန်ကုန်မြို့၊ ၁၉၀၇-ခုနှစ်ထုတ် စာအုပ်မူ
- [မ] - မြန်မာစာညွန့်ပေါင်းကျမ်း၊ တတိယတွဲမူ
- [ဘ] - ဘားနတ်ပိဋကတ်တိုက်ပေမူ၊ ရန်ကုန်မြို့
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |