လယ်သမားဘွဲ့ တျာချင်း
ဝသန်ကာလ၊ မိုးကျတည့်လျှင်၊
ပျော်ပျော်ပါးပါးမယားနှင့် ဆွေငယ်လင်။
လက်တွဲငယ်ခြေငင် ကိုယ်တွင်အဝတ်။
ပုဆိုး အင်္ကျီ၊ စုတ်ပြဲပြီ၊ ချည်နီဗေါင်း တွက်တွက်ကယ်နှင့်လေး။ ။
မိုးရေစွတ်လို့ အဝတ်ကယ်မပါ။
သားသ္မီးကို၊ ကိုယ်ထီးပွေ့လို့သာ။
ဆေးတံတထွာ၊ ကိုက်ကာထွန်ရင်း။
လယ်ကွက်ကယ်တခွင်၊ထွန်ရေးငင်၊ ရေဝင်ပုစွန်တွင်းငယ်နှင့်လေး။ ။
ဖါးပေါင်စင်းငယ်၊ ခြင်းပလိုင်းဝယ်။
ခရုပိလော၊ရောနှော၍သာလွယ်။
ဟင်းရွယ်ကယ်နုနယ်၊ တသွယ်ကန်စွန်း။
ဆူးပုပ်ကယ်ကင်းပုံ၊ အလုံးစုံ၊ ဖူးငုံသာရော၍ ပြွမ်းသည်နှင့်လေး။
ချိုလည်းချိုလွန်း၊ ရည်ရွှမ်းများစွာ။
ကြံ့ဟင်းကြွက်နားပေါင်း၊ သောင်းပြောင်းရော၍သာ။
အိမ်သို့ရောက်ခါ၊ လျင်စွာချက်ပြုတ်။
ထမင်းကပူ၊ ဟင်းကပူ၊ ရှူရှူသာရှမ်း ငရုတ်ကယ်နှင့်လေး။ ။
အလုပ်ကယ်ဧရာသာ၊ ငုံ့ကာလွေးတော့သည်။
သားမြေးငယ်မာချာ၊ ဘယ်ညာထွေးတော့သည်။ ။
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |