ကုံရာသီ တပို့တွဲလဘွဲ့ လူးတား
နှစ်သိန်းစက်ခန်း၊ ချင့်မှန်းအညီ၊
ရာသီတိန၊ နှင်းကစိုရွှဲ၊ ပေါက်လဲနီတွေး၊
ငှက်ကျေးပျော်မြူး ရင့်ကြူးလေ။ ။
မြိုင်ခြေရိပ်ခွင်၊ ရွက်ရင့်ဝင်၍၊
ဆီးရွှင်နှင်းရွှင်[၁]၊ သန်ကြွင်းဆင်သည်၊
ရွှေသွင်နီမြန်း[၂]၊ ပေါက်ဆူးပန်းတို့၊
ထူးဆန်းလှတင့်၊ ရိုးတံမြင့်နှင့်၊
ပွင့်ကြစီစီ၊ ကုန်ရာသီဟု၊
နာရီနှစ်ဝ၊ နံနှင့်ပြသော်၊
ပူးလှကျားမင်း[၃]၊ နေ့ဘို့ခင်းသည်၊
ညဉ့်တွင်းရီမှောင်၊ ဆင်ပြောင်ခြင်္သေ့[၄]၊
ပျော်မွေ့မြူးသန်း၊ ဓာတ်ဆန်းဝါယော၊
တောင်တောဝန်းကျင်၊ စုံမြိုင်ခွင်တွင်၊
ပျော်ရွှင်ကျေးသား၊ ကုလားကြက်တော[၅]၊
ဥဩောဖိုမ၊ ကြွေးကြော်ကြသား၊
မာသခေါ်မြဲ၊ တပို့တွဲတွင်၊
မိုးထဲတောက်ပ၊ ကြယ်မာဃနှင့်၊
ငွေလယုန်နန်း၊ လှည့်ကြမြန်းသော်၊
ယှဉ်သန်းထွန်းလှာ၊ ချိန်တာရာတို့၊
လျှံဝါလင်းလင်း၊ ဂြိုဟ်မင်းရောင်ရှိန်၊
သူရိန်ရောင်လွန်၊ သရဝဏ်နှင့်၊
လျှင်မြန်လှည့်ကြ၊ ပဉ္စဘဝါး[၆]၊
ဝင်သွားမဇ္ဈေ၊ ရှေ့ရှုနေ၍၊
ရေနတ်မင်းလှ၊ ကသစ်ရသား၊
မာသသည်ခါ၊ သုံးလူ့ချာကို၊
ရှိန်ဝါရောင်ညီး၊ မီးပုံးပူဇော်၊
လှူတော်လှူမြဲ၊ ရာသီပွဲဟု၊
ငွေသဲကျွန်းသောင်၊ ပျို့နေရောင်နှင့်၊
ငှက်မောင်နှံများ၊ ကစားမြူးခုံ၊
သက်တုံဆန်တက်၊ လည်ယှက်မြူးထူး၊
ရင့်ကြူးညံ့အေး[၇]၊ မြစ်တွေးသောင်တင်း၊
ရွှေတိမ်ညင်းတို့၊ မကြွင်းဖိုမ၊
ရွှင်ပျော်ကြရှင့်၊ တိနရာသီ[၈]၊
ဖူးတံစီသည်[၉]၊ သိင်္ဂီရောင်သန်း၊
ပေါက်ဆူးပန်းနှင့်၊ တိုင်တန်းလျှောက်ဆို၊
မိဘုန်းမိုလျှင်၊ စိတ်လိုရှည့်မှန်း[၁၀]၊
မြတ်ရာလှမ်း၍၊ ဆောင်ခန်းလယ်ဗွေ၊
ညံ့ပြေပြေနှင့်[၁၁]၊ ပန်စေဆုယူ[၁၂]၊
ကြာနန်းသူတို့၊ ဖော့အူပန်းလွှာ[၁၃]၊
မူရာယဉ်ပျောင်း၊ ဖယောင်းပုံတု၊
ကြာဝတ်စုတွင်၊ ယုယုယယ၊
ဖွားမြင်စသို့၊ အလှကြန်ညီ၊
ကုမ္မာရီတို့၊ ရာသီမာသ၊ သည်ကာလကို၊
ချမ်းမြတုန်အေး၊ ပြောက်ခြူးသေးတွင်[၁၄]၊
စက်ကွေးလွှမ်းခြုံ[၁၅]၊ ဖော်မစုံသည်၊
ရုပ်ပုံကိုယ်ဟန် ကဲ့သို့လေ[၁၆]။ ။
ဆံခွေတည့်နောက်တွဲ ရှုမစဲ။ ။
လဲလုယိမ်းနွဲ့ကိုယ်။ ။
မိုမိုတည့်ရစ်သန်း မူရာဆန်း[၁၇]။ ။
ယဉ်ပန်းလှကညာ။ ။
သံသာတည့်ရွှင်ပြုံး ရွဲမျက်လုံး[၁၈]။ ။
မှတ်ချက်
[ပြင်ဆင်ရန်]- ↑ မြိုင်ခြေရိပ်ခွင်၊ ရွက်ဟောင်းဆင်၍၊ ညှာပင်ကြွေလှု၊ ရတုရွှင်ရွှင် (မ) (ဟ)
- ↑ သန့်ရှင်းစင်လျက်၊ ဝါလွင်နီမြန်း (မ) (ဟ)
- ↑ နာရီနှစ်ခါ၊ ပူးလာကျားမင်း (မ) (ဟ)
- ↑ ဆင်ပြောင် ညှင်းနေ့ (မ) (ဟ)
- ↑ လူးလားကြက်တော (မ) (ဟ)
- ↑ ဧကဘဝါး (မ) (ဟ)
- ↑ ရင့်ကျူးသီအေး (မ) (ဟ)။ ရင့်ကျူးသံအေး (ဘ)။
- ↑ မကြွင်းဖိုမ၊ (ရွှင်ပျော်ကြရှင့်၊) တိနရာသီ (မ) (ဟ)
- ↑ ဖူးစီတန်ဆောင် (မ) (ဟ)
- ↑ စိတ်လို ရည်မှန်း (မ) (ဟ)
- ↑ အောင်သပြေနှင့် (မ) (ဟ)
- ↑ မသွေ ဆုယူ (မ)။ မနေဆုယူ (ဟ)။
- ↑ ဖော့အူပမာ (မ) (ဟ)
- ↑ ပြောက်ခြုံသွေးတွင် (ဘ)။ မြောက်လေသွေး၍ (မ) (ဟ)။
- ↑ စက်ကွေးမလုံ (မ) (ဟ)
- ↑ ရွှေပုံရုပ်ဟန်ကဲ့သို့လေး (မ) (ဟ)
- ↑ ပိုပိုလို့ ရစ်သန်း ရှုမခန်း (မ) (ဟ)
- ↑ မူရာကကြော့ရှင်း ခြောက်ပြစ်ကင်း (မ) (ဟ)
- မူရင်း - ရေနံချောင်း တွင်းစားကြီးဦးဘိုးဂုဏ် လက်ရေးမူ
- [ဟ] - ဟံသာဝတီပုံနှိပ်တိုက်၊ ရန်ကုန်မြို့၊ ၁၉၀၇-ခုနှစ်ထုတ် စာအုပ်မူ
- [မ] - မြန်မာစာညွန့်ပေါင်းကျမ်း၊ တတိယတွဲမူ
- [ဘ] - ဘားနတ်ပိဋကတ်တိုက်ပေမူ၊ ရန်ကုန်မြို့
|
ဤလုပ်ဆောင်မှုသည် ဇန်နဝါရီ ၁၊ ၁၉၂၉ မတိုင်မီ ဖြန့်ချိခဲ့ပြီး ဖြစ်ပြီး ဖန်တီးသူ ကွယ်လွန်ခဲ့သည်မှာ အနည်းဆုံး နှစ် ၁၀၀ ရှိခဲ့ပြီး ဖြစ်သဖြင့် ယခုအခါ တစ်ကမ္ဘာလုံးတွင် အများပြည်သူပိုင် ဖြစ်သည်။ |