လူသေလူဖြစ် ဝါဒါနုဝါဒ ဝိနိစ္ဆယ/ပါဠိတော်များ ထုတ်ပယ် ဖျက်ဆီးခြင်းနှင့်စပ်သော ဝိနိစ္ဆယ
လူသေလူဖြစ် ဝါဒါနုဝါဒဝိနိစ္ဆယ ဆုံးဖြတ်ချက်
နိုင်ငံတော် သီးခြား ဝိနည်းဓိုရ် အဖွဲ့ အမှတ် (၂)
စောဒနာ အမှတ်-၂၁
ဘုရားဟော ပါဠိတော်များ ထုတ်ပယ် ဖျက်ဆီးခြင်းနှင့်
စပ်သော ဝိနိစ္ဆယ
သံဂါယနာ ခြောက်တန်တင်ပြီးသော ဘုရားဟော ပါဠိတော် အမှန်အများကို လူသေလူဖြစ် ဝါဒနှင့် မကိုက်ညီပါက ဘုရားဟော မဟုတ်ဟူ၍လည်ကောင်း၊ ဟိန္ဒူဗြဟ္မဏဝါဒဟူ၍လည်းကောင်း၊ ဗုဒ္ဓဘာသာဝင်များ အမြင်မှားအောင် လှည့်စားလိမ်ညာဝါဒဖြန့်ခြင်းနှင့် ပတ်သတ်သော စောဒနာ သောဓနာ ၂-ရပ်ကို စိစစ်သုံးသပ်ချက်။
၁။ စောဒကဆရာတော်များက လူသေလူဖြစ် သမ္မာဒိဋ္ဌိသုတေသနတို့၏ နိကာယ်၏ နိကာယ် စသော စာအုပ်စာတမ်းများမှ အဓမ္မဝါဒများဟု ထုတ်နုတ်တင်ပြ စောဒနာရာ၌ ၂၁-ချက်မြောက်ဖြစ်သော သံဂါယနာ ၆-တန်တင် ဘုရားဟောပါဠိတာ်များကို လူသေလူဖြစ်ဝါဒနှင့် မကိုက်ညီပါက ဘုရားဟောမဟုတ် ဟိန္ဒူဗြဟ္မဏဝါဒဖြစ်ကြောင်း သမုတ်ကာ ထုတ်ပယ်ခဲ့ပုံကို ပုံစံ သာဓက တင်ပြထုတ်ဆောင်၍ စောဒနာကြလေသည်။
၂။ စောဒကဆရာတော်တို့၏ စောဒနာချက်၌ က-ခ-ဂ-ဃ-င-စ-ဆ-ဇ နှင့် ည အထိ ပါရှိရာ ယင်းတို့တွင် ဗုဒ္ဓဘာသိတ ပါဠိတော်များကို မည်သို့မည်ပုံ နုတ်ပယ်ထုတ်ပစ်ထား၍ ပုံပျက်ပန်းပျက် ပြုမူထားကြပုံတို့ကို သိသာအောင် တင်ပြထားပေသည်။
(က) အမှတ်ပြ အပိုဒ်တွင် ဒီဃနိကာယ်၊ ဗြဟ္မဇာလသုတ်မှ မုသာဝါဒ သိက္ခာပုဒ်နှင့် ဖရုသဝါစာသိက္ခာပုဒ်တို့ကို ဖြုတ်ပယ်ထားခဲ့ပုံကို စာမျက်နှာနှင့်တကွ တွဲဖက်တင်ပြ၍ (ခ)အမှတ်ပြ အပိုဒ်တွင် ယင်း ဗြဟ္မဇာလသုတ်မှ ဧကစ္စသဿတဝါဒဆိုင်ရာ ပါဠိတော်ကို ဖျက်ဆီးထုတ်ပယ်ထားပုံကို တင်ပြထားပေသည်။ (ဂ) အမှတ်ပြအပိုဒ်တွင် ဒီဃနိကာယ်၊ သာမညဖလသုတ်လာ ဝိဇ္ဇာရှစ်ပါးဆိုင်ရာ ပါဠိတော်များမှ မနောမယိဒ္ဓိဉာဏ်၊ ဣဒ္ဓိဝိဓဉာဏ်၊ ဒိဗ္ဗသောတဉာဏ်၊ စေတောပရိယဉာဏ်၊ ပုဗ္ဗေနိဝါသဉာဏ်နှင့် ဒိဗ္ဗစက္ခုဉာဏ်တို့ကို ဖွင့်ဆိုဟောပြတော်မူထာသည့် ပါဠိတော်များ (ပါဠိတော် စာမျက်နှာ-၆ မျက်နှာတိတိ)ကို ဖြုတ်ပယ်ထားသည်ကို တင်ပြပြီးလျှင် (ဃ) အမှတ်ပြအပိုဒ်တွင် သီလက္ခန္ဓဝဂ္ဂ၊ ကေဝဋ္ဋသုတ်မှ စာပိုဒ်တစ်ပိုဒ်ကို ထုတ်၍ အဓိပ္ပာယ်တစ်မျိုးတစ်မည် ဖြစ်သွားစေပုံကို ထုတ်ဖော်တင်ပြထားပေသည်။
ထို့အတူ (င) အမှတ်ပြ အပိုဒ်တွင် ကေဝဋ္ဋသုတ်လာ ဘူတနိရောဓေသကဘိက္ခု ဝတ္ထု တစ်ပုဒ်လုံး ထုတ်ပစ်ပုံကို ဖော်ထုတ်တင်ပြ၍ (စ) အမှတ်ပြအပိုဒ်တွင် အင်္ဂုတ္တရနိကာယ်၊ တိကနိပါတ်၊ ကေသမုတ္တိသုတ်မှ ဗြဟ္မစိုရ်တရားလေးပါးဆိုင်ရာ ပါဠိတော်များကို ထုတ်ပစ်ခဲ့ကြောင်း ထောက်ပြတင်သွင်းထားခဲ့ပေသည်၊ ထို့နောက် (ဆ-ဇ-စျ-ည) အမှတ်ပြ စာပိုဒ်တို့ဖြင့် ဘုရားဟော ပိဋကတ်တော်များမှ အချို့ ပိဋကတ်တော်တို့ကို ဘုရားဟောမဟုတ်၊ ရမ်းရမ်းကားကားပြောကြား ရေးသားထားပုံတို့ကို အမည်နာနှင့်တကွ တင်ပြစောဒနာထားသည်ကို တွေ့ရပေသည်၊ စုဒိတက ဦးဆန္ဒာဓိက၏ ချေဆိုချက်ဖြစ်သော သံဂါယနာနှင့် စပ်သည့် စကားကို စောဒနာ အမှတ် (၆ နှင့် ၂၀) ဝိနိစ္ဆ၌ စိစစ်ဆုံးဖြတ်ပြီး ဖြစ်သည်။
၃။ ဝိနည်းဓိုရ်ဆရာတော်များသည် စောဒကတို့ တင်ပြထားသော စောဒနာချက်များကို ဆိုင်ရာပိဋကတ်တော်များနှင့် တိုက်ဆိုင်စစ်ဆေးကြည့်ရှုကြသည်၊ ယင်း ပါဠိတော်တို့ကို အတိအလင်း ထုတ်ပယ်ထားသော နိကာယ်၏ နိကာယ် အမည်ရှိ စာအုပ်ကိုလည်း စစ်ဆေးကြည့်ရှုကြသည်၊ ထိုသို့ စစ်ဆေးကြည့်ရှုကြသောအခါ စောဒကဆရာတော်များ တင်ပြထားသည့်အတိုင်းပင် ဒီဃနိကာယ် သီလက္ခန်ပါဠိတော်၌လည်းကောင်း၊ အင်္ဂုတ္တရနိကာယ် တိကနိပါတ ကေသမုတ္တိသုတ်၌လည်းကောင်း အရေးကြီးသော ဘုရားဟောပါဠိတော်များကို ထုတ်ပယ်သည်ကို တွေ့ရပေသည်။
၄။ နိကာယ်၏ နိကာယ်စာအုပ်တွင် စောဒကဆရာတော်များ ထောက်ပြထားသော အချက်များမှတစ်ပါး မဇ္ဈိမနိကာယ် စသော နိကာယ်များမှ ပါဠိတော်များကို ထုတ်ပစ်ထားချက်များကိုလည်း တွေ့ရပြန်သည်၊ မဇ္ဈိမနိကာယ် မူလပရိယာယသုတ်၌ “ဤသုတ်နောက်ပိုင်း၌ပါသော ဘူတဒေဝစသော အကြောင်းတရားများကား ဓမ္မခန္ဓာ ရှစ်သောင်းလေးထောင်ဟူသော အရေအတွက်ပြည့်မီရေးမှ အပ အကျိုးမရှိပေ” ဟူ၍ လည်းကောင်း၊ ဓမ္မဒါယာဒသုတ် ၌ “သုတ်တိုလွန်းနေသဖြင့် မဇ္ဈိမနိကာယ်၌ သွတ်သွင်းနိုင်ရေးအတွက် နောက်မှဖြည့်စွက်ထားသော စကားရပ်များသာ ဖြစ်သည်” ဟူ၍ လည်းကောင်း မှတ်ချက် ရေးသွင်းထားပေ၏၊
၅။ ထိုနည်းတူ သခင်မြတ်ဆိုင်၏ ပိဋကတ်တော် ကောက်နုတ်ချက်များ စာအုပ် နိဒါန်း၌ “ယင်း အခြေခံ တရားစစ် တရားမှန်ကို မျက်ကွယ်ပြုကာ သံဂါယနာတင် အကြိမ်ကြိမ် ပြုကြရာ၌ ဗြဟ္မဏဝါဒတို့၏ တရားများကို ဗုဒ္ဓတရားလုပ်ကာ ပပဉ္စတရားသာလျှင်ဖြစ်သော သံသရာနယ် ၃၁-ဘုံ ဝဲဩဃကြီးကို ထိုးသွင်းခဲ့ကြလေသည်” ဟု ယခု ပိဋကတ်တော်များရှိ အချို့ ပါဠိတော်များ၌ ဘုရားဟောပါဠိတော် အစစ်မဟုတ်၊ နောက်မှ ထည့်သွင်းချင်တိုင်း ထည့်သွင်းထားလေဟန်ဖြင့် အရှင်မဟာကဿပ စသော သံဂါယနာတင် ရဟန္တာအရှင်မြတ်ကြီးများကို ပြစ်တင်ရှုတ်ချထားလေသည်။
ဤမျှသာမက “မိုးပေါ်လက်ညှိုးထိုး၍မြှောက် မြေကြီး လက်ညှိုးထိုး၍ခြောက် စသော သုတ်များကို အကုန်လုံးမီးလောင်၍ ကုန်ကုန် တစ်သုတ်တစ်လေမျှပင် မကျန်ကျန်” စသော စကားလုံးတို့ကို သုံးဝံ့သူများဖြစ်သည့်အတိုင်း တာဝန်ရှိပုဂ္ဂိုလ်များက အချိန်မီမတားဆီးလျှင် ရှေ့သို့လည်း မည်မျှ ဗုဒ္ဓတရားတော်များကို လက်ရဲဇက်ရဲ ပြစ်တင်ချေဖျက် ထုတ်ပယ်၍ နေဦးမည် မသိချေ။
ဤနေရာတွင် စုဒိတကတို့အနေဖြင့် “ကဿပဘုရားရှင် သာသနာတော်နောက်ပိုင်း” ဘုရားရှင်သာသနာတော်ကို အမြန်ကွယ်ပျောက်အောင် ဆောင်ရွက်အားထုတ်သဖြင့် သေပြီးနောက် အဝီစိငရဲသို့ ရောက်ကြရသည့် ကပိလရဟန်း အမိ သာဓနီ နှမတာပနာတို့၏ ဝတ္ထုကြောင်းကို ကောင်းစွာ နှလုံးသွင်း ဆင်ခြင်သင့်ပေသည်။ သုတ္တနိပါတ်အဋ္ဌကထာ(ဒု-၄၂)။
၆။ စောဒနာ (၂၁) ချက်တို့တွင် ဦးဥက္ကဋ္ဌမှ စ၍ သခင်မြတ်ဆိုင်နှင့် သမ္မာဒိဋ္ဌိသုတေသနအဖွဲ့ဝင်များသည် ရုပ်ဝါဒီများဖြစ်ကြောင်း အကြိမ်ကြိမ်သုံးသပ်ခဲ့ပေသည်။ လူသေလူဖြစ် ဦးဥက္ကဋ္ဌသည် (စ-သ-ဃ-ဇ-က) ဟူသော ပသာဒရုပ်ငါးပါးကိုသာ စဉ်းစားဆင်ခြင်မှု၏ အခြေခံအဖြစ် ထားကြရန် ညွှန်ကြားခဲ့သည့်အတိုင်း သခင်မြတ်ဆိုင်နှင့် သမ္မာဒိဋ္ဌိသုတေသနဆိုသူတို့ကလည်း တသဝေမတိမ်း လိုက်နာခဲ့ကြပေသည်။ ထို့ကြောင့် သမ္မာဒိဋ္ဌိသုတေသနအဖွဲ့ တည်ထောင်သည့် စာတမ်း၌ သမ္မာဒိဋ္ဌိသုတေသနဆိုသည်မှာ မည်သို့သောသူများ ဖြစ်ကြောင်း ဖော်ပြရာတွင် ဦးဥက္ကဋ္ဌ၏ သွန်သင်ချက်အတိုင်း ပသာဒရုပ်ငါးပါးကိုသာ မူသေကိုင်ပြီး အမှန်တရားရှာသူများဖြစ်ကြောင်း ဖွင့်ပြခဲ့ပေသည်။
ဦးဥက္ကဋ္ဌနှင့် တပည့်ကြီး သခင်မြတ်ဆိုင်နှင့် သမ္မာဒိဋ္ဌိသုတေသနအဖွဲ့ နာယက ဥက္ကဋ္ဌ အမှုဆောင် အသင်းသားတို့သည် ပသာဒရုပ်ငါးပါးတို့ကိုသာ ဆုပ်ကိုင်ထားသော(ဝါ) ပကတိ မျက်စိ၊ နား၊ နှာခေါင်း၊ လျှာ၊ ကိုယ် ဟူသော ရုပ်တရား ငါးပါးဖြင့် မြင် ကြား နံ လျက် ထိ တွေ့၍ ရမှသာ အမှန် သို့မဟုတ်က မမှန်ဟု တရားသေကိုင်ထားသူ ရုပ်ဝါဒီများဖြစ်ကြသည့်အလျောက် မနောဝိညာဏ်ဆိုင်ရာ အခန်းကဏ္ဍကို လုံးဝပယ်ထားကြသည်။
၇။ ဤကဲ့သို့ ရုပ်ဝါဒအမြင် အခြေခံဖြင့် သံဂါယနာ ၆-တန်တင် ပိဋကတ်တရားတော်များကို တိုင်းတာကြည့်သောအခါ မကိုက်ညီဘဲ တွေ့ရသောကြောင့် ရုပ်ဝါဒအခြေခံများနှင့် ကိုက်ညီအောင် ပါဠိတော်အမှန်များကို ဖြုတ်ပယ်ခြင်း၊ ဗြဟ္မဏဝါဒများဟု စွပ်စွဲခြင်း၊ ပါဠိတော်လက်သစ်များကို ဖန်တီးခြင်း၊ ပါဠိတော်မှန်ကို ရုပ်ဝါဒ အနက်အဓိပ္ပာယ်ဖြစ်လာအောင် ဆွဲယူအနက်ပေးခြင်းများ ပြုလုပ်ကြခြင်းသာ ဖြစ်ပေသည်။
သို့ဖြစ်၍ သံဂါယနာ ၆-တန်တင် ပါဠိတော်များကို ဖြုတ်ပယ် ထုတ်နုတ်ပစ်ခြင်း၊ လူသေလူဖြစ်ရုပ်ဝါဒနှင့် ကိုက်ညီအောင် ပါဠိတော်အမှန်များကို လိုသလို ဆွဲယူအနက်ပေးခြင်း၊ ပါဠိလက်သစ်များကို တီထွင်ဖန်တီးခြင်း ပြုလုပ်၍ ဟောကြားရေးသားကြသော ဦးဥက္ကဋ္ဌနှင့် နောက်လိုက်တို့၏ အယူအဆများသည် သံဂါယနာ ၆-တန်တင် ဓမ္မဝါဒမဟုတ်မူ၍ ထေရဝါဒပိဋကကျမ်းဂန်နှင့် ဆန့်ကျင်နေသောကြောင့် အဓမ္မဝါဒများသာ ဖြစ်ပေသည်။
၈။ ဗုဒ္ဓဘုရားရှင် ပရိနိဗ္ဗာန်စံလွန်တော်မူသည်မှ စ၍ ယနေ့အထိ နှစ်ပေါင်း ၂၅၀၀-ကျော်မျှ တည်ရှိလာသော သံဂါယနာ ၆-တန်တင် ဗုဒ္ဓပိဋကတ်တော်များကို ရုပ်ဝါဒီ ဦးဥက္ကဋ္ဌ ခေါင်းဆောင်သော အယူသီး ဘာသာရေးသောင်းကျန်းဂိုဏ်းက ဖြုတ်ထုတ်သတ် လုပ်နေကြပေသည်။ ဒေးဒရဲ ဦးဥဇ္ဇောတိက ကျောင်းဝိုင်းအတွင်း၌ ပါဠိတော်များကို ဖြုတ်ထုတ်သတ်ပြီး မြှပ်နှံထားသည့် သချႌုင်းအထိမ်းအမှတ် ကျောက်တိုင်စိုက်ထူထားလျက် ရှိပေသည်။
၉။ လောကကောင်းကျိုးအလို့ငှာ ဘုရားရှင်ထားရစ်တော်မူခဲ့သော “ပါဠိတော်များ မကွယ်မပစေရန် မိမိတို့၏ ဘဝကို သာသနာသို့ပေးအပ်ပြီး” စာပေပရိယတ်ကို သင်ကြားပို့ချနေသော တစ်သိန်းကျော် သံဃာတော် အရှင်မြတ်တို့အား စုဒိတက သခင်မြတ်ဆိုင်နှင့် သမ္မာဒိဋ္ဌိသုတေသနဆိုသူ လူတစ်စုက တစ်ဆိတ်ကလေးမျှ အားမနာဘဲ ရန်သူလိုမြင်ကြပြီး ပက်ပက်စက်စက် ပုတ်ခတ်ရှုတ်ချ ရေးသားဟောပြောနေကြသဖြင့် နိုင်ငံတော်အတွင်း၌ သူတို့ကြောင့် ပဋိပက္ခတွေပေါ်လာပြီး စည်းရုံးရေးပြိုလဲလျက်ရှိနေခြင်းသည် “အရင်းစစ် အမြစ်မြေက” ဆိုသကဲ့သို့ သခင်မြတ်ဆိုင်နှင့် သမ္မာဒိဋ္ဌိသုတေသနဆိုသူတို့၏ ပါဠိတော် ဖြုတ်ထုတ်သတ် လမ်းစဉ်ကြောင့်ပင် ဖြစ်ပေသည်။
၁၀။ သမ္မာဒိဋ္ဌိသုတေသနအမည်ခံ တစ်ယူသန် ဦးဥက္ကဋ္ဌဂိုဏ်းသားတို့၏ ဗုဒ္ဓဘာသာထဲဝင်ပြီး ပါဠိတော်ဖြုတ်ထုတ်သတ် လမ်းစဉ်ကို ကျင့်သုံးနေကြခြင်းသည် နေမြင့်လေ အရူးရင့်လေဖြစ်လာပြီး ဗုဒ္ဓဘာသာရဟန်းရှင်လူတို့၏ သည်းခံနိုင်မှု အတိုင်းအတာကို ကျော်လွန်စေသည့် အဆင့်သို့ ရောက်သောအခါ ဘုရားရှင်၏ သာသနာတော်အတွင်း၌ အကုသိုလ်တရားများ တိုးပွားလာကြမည် ဧကန်ဖြစ်သည်။
၁၁။ သို့ဖြစ်သောကြောင့် မိမိတို့ထင်လျှင် ထင်သလို မထင်လျှင် မထင်သလို ထေရဝါဒ ပိဋကတ်တော်များကို အဓမ္မအကြမ်းဖက်၍ “ဖြုတ်ထုတ်သတ်” ပြုလုပ်နေကြခြင်းသည် စင်စစ် အယူဝါဒ အဓမ္မလမ်းစဉ်ကိုသာလျှင် ထူထောင်နေကြခြင်းဖြစ်ကြောင်း နိုင်ငံတော်သီးခြားဝိနည်းဓိုရ်အဖွဲ့ အမှတ်(၂) ဆရာတော်များက တညီတညွတ်တည်း လေးလေးနက်နက် ဆုံးဖြတ်တော်မူကြသည်။