သာမဏေရာနံ ဝတ္ထုဂါထာ
ပထမကျော်၊ သာသနဓဇသိရီပဝရ ဓမ္မာစရိယ ဒေါ်ဝိဇ္ဇေသီ၏ သရုပ်ပြဓမ္မပဒကျမ်း
၂၆-ဗြာဟ္မဏဝဂ်။ ၂၃-သာမဏေရာနံဝတ္ထု
၄၀၆။ အဝိရုဒ္ဓံ ဝိရုဒ္ဓေသု၊ အတ္တဒဏ္ဍေသု နိဗ္ဗုတံ။
သာဒါနေသု အနာဒါနံ၊ တမဟံ ဗြူမိ ဗြာဟ္မဏံ။
ဤတရားဒေသနာတော်ကို ဘုရားရှင်သည် သာဝတ္ထိပြည် ဇေတဝန်ကျောင်းတော်၌ သီတင်းသုံးနေတော်မူစဉ် ဆွမ်းညွှန်အလှည့်ကျသော သံကိစ္စ, ပဏ္ဍိတ, သောပါက, ရေဝတဟူသော ခုနစ်နှစ်အရွယ်သာရှိသော ရဟန္တာသာမဏေတို့ကို အကြောင်းပြု၍ ဟောတော်မူသည်။
ဒေသနာတော်အဆုံး၌ များစွာသော ပုဂ္ဂိုလ်တို့ သောတာပန် စသည် ဖြစ်ကြသည်။
အနက်
ဝိရုဒ္ဓေသု၊ ဆန့်ကျင်ဘက်ပြုသူတို့၌။ အဝိရုဒ္ဓံ၊ မဆန့်ကျင်သော။ အတ္တဒဏ္ဍေသု၊ တုတ် ဓား စသောလက်နက်ချထားသူတို့၌။ နိဗ္ဗုတံ၊ လက်နက်ချထားပြီးဖြစ်၍ ရန်ငြိမ်းအေးသော။ သာဒါနေသု၊ ခန္ဓာတို့ကိုစွဲလမ်းသော သူတို့၌။ အနာဒါနံ၊ စွဲလမ်းခြင်းမရှိသော။ တံ၊ ထိုပုဂ္ဂိုလ်ကို။ ဗြာဟ္မဏံ၊ ဗြာဟ္မဏဟု။ အဟံ၊ ငါဘုရားသည်။ ဗြူမိ၊ ဟောတော်မူ၏။
စကားပြေ
ဆန့်ကျင်ဘက်ပြုသူတို့၌ မဆန့်ကျင်သော တုတ် ဓား စသောလက်နက်ကိုချထားပြီး၍ ရန်ငြိမ်းသော ခန္ဓာတို့ကို စွဲလမ်းသူတို့၌ စွဲလမ်းခြင်းမရှိသောသူကို ဗြာဟ္မဏဟု ငါဘုရား ဟော၏။
ဝိရုဒ္ဓေသု—ရန်ငြိုးဖွဲ့ခြင်း အစွမ်းဖြင့် ဆန့်ကျင်သော လောကီလူအပေါင်း။
အတ္တဒဏ္ဍေသု—လက်ထဲတွင် တုတ်ဓားမရှိသေးသော်လည်း ရိုက်ပုတ်ခြင်းမှ ရှောင်ကြဉ်သောကြောင့် သူတပါးအားမရိုက်ပုတ်သောသူ။
အနာဒါနံ—ခန္ဓာငါးပါးသည် ငါဖြစ်၏၊ ငါ့ဥစ္စာဖြစ်၏ဟု စွဲလမ်းခြင်းမရှိသောသူ။
သာမဏေကျော်များ—သံကိစ္စ, ပဏ္ဍိတ, သောပါက, ရေဝတတို့လေးပါးသည် ခုနစ်နှစ်အရွယ်၌ပင် ရဟန္တာဖြစ်ကြသည်။ (ဓမ္မ၊ဋ္ဌ၊၂။၄၁၆)
ပါဠိစကားလုံး ဖွဲ့စည်းပုံ
ဝိရုဒ္ဓေသု = ဝိရုဇ္ဈတီတိ ဝိရုဒ္ဓေါ။ ဝိ+ရုဓ်+တ။
အတ္တဒဏ္ဍေသု = အတ္တော ဒဏ္ဍော ယေနာတိ အတ္တဒဏ္ဍော။ အတ္တ+ဒဏ္ဍ+ယ။ အတ္တ+အာ+ဒါ+တ။
သာဒါနေသု = သဟ အာဒါနေန ယော ဝတ္တတီတိ သာဒါနော။ သဟ+အာဒါန+ယ။
သာမဏေရာနံဝတ္ထု ပြီး၏။
အရှင်သုဇနာဘိဝံသ၏ ဓမ္မပဒဂါထာနိဿယ
၂၆-ဗြာဟ္မဏဝဂ်
၂၃-သာမဏေရာနံ ဝတ္ထု ပါဠိဂါထာ
သာဒါနေသု အနာဒါနံ, တမဟံ ဗြူမိ ဗြာဟ္မဏံ။
ဝိရုဒ္ဓေသု၊ ဆန့်ကျင်ရန်မူ, လောကီလူတို့၌။ အဝိရုဒ္ဓံ၊ ဒေါသကင်းစင်, မဆန့် ကျင်သော။ အတ္တဒဏ္ဍေသု၊ စွဲကိုင်အပ်ငြား, တုတ်ဓားလက်နက်ရှိသူတို့၌။ နိဗ္ဗုတံ၊ လက်နက်ကိုသိမ်း, ကိလေသာငြိမ်းပြီးသော။၁ သာဒါနေသု၊ ငါငါ့ဥစ္စာ, တွယ်တာစွဲငြိ, တဏှာဒိဋ္ဌိရှိသူတို့၌။ အနာဒါနံ၊ ငါငါ့ဥစ္စာ, တွယ်တာစွဲငြိ, တဏှာဒိဋ္ဌိမရှိသော။ တံ၊ ကို။ ပေ။ ဗြူမိ၊ ၏။ (ပါ-၄၀၆)
၁။အတ္တဒဏ္ဍေသူတိ ဂဟိတဒဏ္ဍေသု၊ [အာဒီယတေတိ အတ္တော၊(အာ+ဒါ+တ၊) အတ္တော+ဒဏ္ဍော ယေဟီတိ အတ္တဒဏ္ဍာ၊] နိဗ္ဗုတန္တိ ကိလေသနိဗ္ဗာနေန နိဗ္ဗုတံ၊-မ၊ဋ္ဌ၊၃၊၂၉၉။
သာမဏေရာနံ ဝတ္ထု ဂါထာနိဿယပြီးပြီ။