ဥတ္တရာဥပါသိကာဝတ္ထုဂါထာ
ပထမကျော်၊ သာသနဓဇသိရီပဝရ ဓမ္မာစရိယ ဒေါ်ဝိဇ္ဇေသီ၏ သရုပ်ပြဓမ္မပဒကျမ်း
၁၇-ကောဓဝဂ်
၃-ဥတ္တရာဥပါသိကာဝတ္ထု
၂၂၃။ အက္ကောဓေန ဇိနေ ကောဓံ၊ အသာဓုံ သာဓုနာ ဇိနေ။
ဇိနေ ကဒရိယံ ဒါနေန၊ သစ္စေနာလိကဝါဒိနံ။
ဤတရားဒေသနာတော်ကို ဘုရားရှင်သည် ရာဇဂြိုဟ်ပြည်အနီး ဝေဠုဝန်ကျောင်းတော်၌ သီတင်းသုံးနေတော်မူစဉ် ရာဇဂြိုဟ်သဌေးသုမန၏ ချွေးမ၊ ပုဏ္ဏသဌေး၏သမီးက မိမိခင်ပွန်းအတွက် ခေတ္တငှားထားသော သီရိမာကို ငြူစူ၍ ထောပတ်ပူဖြင့် လောင်းသည်ကို မေတ္တာဖြင့် နေသော ဥတ္တရာအမျိုးသမီးကို အကြောင်းပြု၍ ဟောတော်မူသည်။
ဒေသနာတော်အဆုံး၌ သီရိမာနှင့် ငါးရာသော အမျိုးသမီးတို့ သောတာပန်ဖြစ်ကြသည်။
အနက်
ကောဓံ၊ အမျက်ထွက်သောသူကို။ အက္ကောဓေန၊ မေတ္တာတရားဖြင့်။ ဇိနေ၊ အောင်ရာ၏။ အသာဓုံ၊ မကောင်းသောသဘောရှိသူကို။ သာဓုနာ၊ ကောင်းသောသဘောဖြင့်။ ဇိနေ၊ အောင်ရာ၏။ ကဒရိယံ၊ နှမြောဝန်တိုသောသူကို။ ဒါနေန၊ ပေးကမ်းခြင်းဖြင့်။ ဇိနေ၊ အောင်ရာ၏။ အလိကဝါဒိနံ၊ မဟုတ်မမှန်ပြောသောသူကို။ သစ္စေန၊ ဟုတ်မှန်စွာ ပြောဆိုခြင်းဖြင့်။ ဇိနေ၊ အောင်ရာ၏။
စကားပြေ
အမျက်ထွက်သောသူကို မေတ္တာတရားဖြင့်၊ မကောင်းသောသဘောရှိသူကို ကောင်းသောသဘောဖြင့်၊ နှမြောဝန်တိုသောသူကို ပေးကမ်းခြင်းဖြင့်၊ မဟုတ်မမှန်ပြောသောသူကို ဟုတ်မှန်စွာ ပြောဆိုခြင်းဖြင့် အောင်ရာ၏။
အဘနှစ်မျိုး—ပုဏ္ဏသဌေးသည် ဥတ္တရာအမျိုးသမီး၏ ဝဋ္ဋဇနကပိတာ (သံသရာဝဋ်ဆင်းရဲကို ဖြစ်စေသောအဘ) ဖြစ်သည်။ မြတ်စွာဘုရားသည် ဥတ္တရာအမျိုးသမီး၏ ဝိဝဇနကပိတာ (ဝဋ်မှကင်းရာ နိဗ္ဗာန်ကို ဖြစ်စေသောအဘ) ဖြစ်သည်။
ပါဠိသဒ္ဒါခက်ဆစ်
အလိကဝါဒိနံ = အလိကံ ဝဒတိ သီလေနာတိ အလိကဝါဒီ။ အလိက + ဝဒ် + ဏီ။
အလိကံ = အလတိ ဗန္ဓတိ ဧတေနာတိ အလိကံ။ အလ် + ဏိက။
ဥတ္တရာဥပါသိကာဝတ္ထု ပြီး၏။
အရှင်သုဇနာဘိဝံသ၏ ဓမ္မပဒဂါထာနိဿယ
၁၇-ကောဓဝဂ်
၃-ဥတ္တရာဥပါသိကာဝတ္ထုပါဠိဂါထာ
ဇိနေ ကဒရိယံ ဒါနေန, သစ္စေနာ’လိကဝါဒိနံ။
ကောဓံ၊ အမျက်ထွက်သူကို။ အက္ကောဓေန၊ အမျက်မထွက်သူ၏အဖြစ်ဖြင့်။ ဝါ၊ အမျက်မထွက်ခြင်းမေတ္တာတရားဖြင့်။ ဇိနေ၊ အနိုင်ယူထိုက်၏။ အသာဓုံ၊ မကောင်း သောသူကို။ သာဓုနာ၊ ကောင်းသောသူ၏အဖြစ်ဖြင့်။ ဝါ၊ ကောင်းသောနည်းလမ်းဖြင့်။ ဇိနေ၊ ၏။ ကဒရိယံ၊ ဝန်တိုစေးနှဲ, မစွန့်ကြဲတတ်, စက်ဆုတ်အပ်စွာ, သတ္တဝါကို။ ဒါနေန၊ ပေးကမ်းခြင်းဖြင့်။ ဇိနေ၊ ၏။ အလိကဝါဒိနံ၊ မမှန်သော စကားကို ပြောဆိုလေ့ရှိသူကို။ သစ္စေန၊ အမှန်ကို ပြောဆိုခြင်းသစ္စာဖြင့်။ ဇိနေ၊ ၏။ (ပါ-၂၂၃) [ဓမ္မ-ဋီ-၂၃၃အလို “ကောဓံ၊ ကို။ အက္ကောဓေန၊ အမျက်မထွက်သည်။ (ဟုတွာ၊ ၍။ ဓမ္မေန၊ တရားသဖြင့်။ သမေန၊ မျှတသဖြင့်။) ဇိနေ၊ ၏။ ကဒရိယံ၊ ကို။ ဒါနေန၊ ပေးကမ်းခြင်းဖြင့်။ ဝါ၊ ဒါနနှင့်စပ်သော တရားစကား ဖြင့်။ ဝါ၊ ဓမ္မဒါနဖြင့်။ ဇိနေ၊ ၏။ အလိကဝါဒိနံ၊ ကို။ သစ္စေန၊ သစ္စာ၏ အကျိုးအာနိသင်ကိုပြသော တရားနှင့်စပ်သော စကားဖြင့်၊ ဇိနေ-၏”ဟု ပေး။]
ဥတ္တရာဥပါသိကာဝတ္ထုဂါထာနိဿယပြီးပြီ။