ရောဟိနီခတ္တိယကညာဝတ္ထုဂါထာ
ပထမကျော်၊ သာသနဓဇသိရီပဝရ ဓမ္မာစရိယ ဒေါ်ဝိဇ္ဇေသီ၏ သရုပ်ပြဓမ္မပဒကျမ်း
၁၇-ကောဓဝဂ်
၁-ရောဟိနီခတ္တိယကညာဝတ္ထု
၂၂၁။ ကောဓံ ဇဟေ ဝိပ္ပဇဟေယျ မာနံ၊
သံယောဇနံ သဗ္ဗမတိက္ကမေယျ။
တံ နာမရူပသ္မိမသဇ္ဇမာနံ၊
အကိဉ္စနံ နာနုပတန္တိ ဒုက္ခာ။
ဤတရားဒေသနာတော်ကို ဘုရားရှင်သည် ကပိလဝတ္ထုပြည် နိဂြောဓာရုံကျောင်းတော်၌ သီတင်းသုံးနေတော်မူစဉ် အရှင်အနုရုဒ္ဓါ၏ ညီမ၊ နူနာစွဲနေသော ရောဟိနီမင်းသမီးကို အကြောင်းပြု၍ ဟောတော်မူသည်။
ဒေသနာတော်အဆုံး၌ များစွာသော ပုဂ္ဂိုလ်တို့ သောတာပန်စသည် ဖြစ်၍ ရောဟိနီမင်းသမီးသည် သောတာပန်ဖြစ်သည့်အပြင် နူနာပျောက်ပြီး ရွှေအဆင်းကဲ့သို့ ဖြစ်သည်။
အနက်
ကောဓံ၊ အမျက်ဒေါသကို။ ဇဟေ၊ စွန့်ရာ၏။ မာနံ၊ မာနကို။ ဝိပ္ပဇဟေယျ၊ ပယ်ရာ၏။ သံယောဇနံ သဗ္ဗံ၊ သံယောဇဉ်အားလုံးကို။ အတိက္ကမေယျ၊ ကျော်လွန်ရာ၏။ တံ၊ ထိုသူကို။ နာမရူပသ္မိံ၊ နာမ်ရုပ်၌။ အသဇ္ဇမာနံ၊ မငြိတွယ်သော။ အကိဉ္စနံ၊ မကြောင့်ကြသော။ ဒုက္ခာ၊ ဆင်းရဲဒုက္ခတို့သည်။ နာနုပတန္တိ၊ မကျရောက်ကုန်။
စကားပြေ
အမျက်ဒေါသ၊ မာနမာနနှင့် သံယောဇဉ်မှန်သမျှတို့ကို ပယ်ရမည်။ နာမ်ရုပ်၌ မငြိတွယ်၊ မကြောင့်ကြသူသို့ ဆင်းရဲဒုက္ခ မကျရောက်နိုင်။
မာနံ—၉ ပါးအပြားရှိသော မာန။
သံယောဇနံ—ကာမရာဂသံယောဇဉ်စသော ဆယ်ပါးသော သံယောဇဉ်။
အသဇ္ဇမာနံ—ငါ၏ရုပ်၊ ငါ၏ဝေဒနာ စသည်ဖြင့် နာမ်ရုပ်ကို စွဲလမ်း၏။ ထိုနာမ်ရုပ် ချုပ်ပျောက်ပျက်စီးသော် စိုးရိမ်၏။ ပင်ပန်း၏။ ဤကား နာမ်ရုပ်၌ ငြိတွယ်သည်မည်၏။
ငါ၏ရုပ်၊ ငါ၏ဝေဒနာ စသည်ဖြင့် နာမ်ရုပ်ကို မစွဲလမ်း၊ ထိုနာမ်ရုပ် ချုပ်ပျောက်ပျက်စီးသော်လည်း စိုးရိမ်မှု၊ ပင်ပန်းမှု မရှိ။ ဤကား နာမ်ရုပ်၌ မငြိတွယ်သည်မည်၏။
အကိဉ္စနံ၌ ကိဉ္စန—အရ၊ ရာဂစသော တရားများ ဖြစ်သည်။
ရှေးကံ—ရှေးဘဝက သူ့တပါးကို ယားယံအောင် ပြုခဲ့သောကြောင့် အရှင်အနုရုဒ္ဓါ၏ ညီမ ရောဟိနီမင်းသမီးသည် အရေပြားရောဂါ ဖြစ်ရသည်။ ဆွမ်းစားကျောင်း ဆောက်လုပ်လှူဒါန်းခဲ့ခြင်း၊ တံမြက်လှည်းခဲ့ခြင်းကြောင့် အရေပြားရောဂါ ပျောက်ကင်းသည်။
ပါဠိသဒ္ဒါခက်ဆစ်
ကောဓံ = ကုဇ္ဈနံ ကောဓော။ ကုဓ် + ဏ။
အသဇ္ဇမာနံ = န သဇ္ဇမာနံ အသဇ္ဇမာနံ။ န + သဇ္ဇမာန။
ရောဟိနီခတ္တိယကညာဝတ္ထု ပြီး၏။
အရှင်သုဇနာဘိဝံသ၏ ဓမ္မပဒဂါထာနိဿယ
၁၇-ကောဓဝဂ်
၁-ရောဟိနီခတ္တိယကညာဝတ္ထုပါဠိဂါထာ
တံ နာမရူပသ္မိမသဇ္ဇမာနံ, အကိဉ္စနံ နာနုပတန္တိ ဒုက္ခာ။
ကောဓံ၊ ဒေါသအမျက်, ခြောင်းခြောင်းထွက်သည့်, စိတ်ပျက်စိတ်ဆိုး, စိတ် ကောက်မျိုးကို။ ဇဟေ (ဇဟေယျ)၊ တစ်ရံတစ်ဆစ်မျှ, မဖြစ်ရအောင်, မုချပုံသေ, ပယ်စွန့် လေရာ၏။ မာနံ၊ ငါငါထောင်လွှား, ငါတကားဟု, ထောင်လွှားတက်ကြွ, မာန်မာနကို။ ဝိပ္ပဇဟေယျ၊ တစ်ရံတစ်ဆစ်မျှ, မဖြစ်ရအောင်, မုချပုံသေ, ပယ်စွန့်လေရာ၏။ သဗ္ဗံ သံယောဇနံ၊ သံသရာဝဋ်မှ, မလွတ်ရအောင်, တုပ်နှောင်ဖွဲ့ယှဉ်, အလုံးစုံသော သံယော ဇဉ်ကို။ အတိက္ကမေယျ၊ မဆွယ်အပွား, တကယ်မများအောင်, ပယ်ရှားလွန်မြောက် လေရာ၏။ နာမရူပသ္မိံ၊ ခန္ဓာငါးပါး, ရုပ်နာမ်တရား၌။ အသဇ္ဇမာနံ၊ ငါ့ရုပ်ဝေဒနာ, ငါ့ခန္ဓာ ဟု, စွဲကာမှတ်ဘိ, ကပ်ငြိခြင်းမရှိသော။ အကိဉ္စနံ၊ ရာဂဒေါသ, မောဟကင်းဘိ, ကြောင့် ကြလည်းမရှိေသော။ တံ (ပုဂ္ဂလံ)၊ ဤပြဆိုအပ်, ဂုဏ်သကတ်ဖြင့်, သင့်မြတ်ထုတ်ဆို, ထိုပုဂ္ဂိုလ်သို့။ ဒုက္ခာ၊ ကိုယ်စိတ်နှစ်ဝ, ပင်ပန်းရသည့်, ရှုပ်သမျှအကြောင်း, ဒုက္ခအပေါင်း တို့သည်။ နာနုပတန္တိ၊ ကောဓမာန, စသည်ခပင်း, အကြောင်း ကင်းသဖြင့်, အရှင်းပုံ သေ, မကျရောက်နိုင်လေကုန်သတည်း။ (ပါ-၂၂၁)
ရောဟိနီခတ္တိယကညာဝတ္ထုဂါထာနိဿယပြီးပြီ။