အာနန္ဒတ္ထေရဝတ္ထုဂါထာ
ပထမကျော်၊ သာသနဓဇသိရီပဝရ ဓမ္မာစရိယ ဒေါ်ဝိဇ္ဇေသီ၏ သရုပ်ပြဓမ္မပဒကျမ်း
၂၆-ဗြာဟ္မဏဝဂ်။ ၅-အာနန္ဒတ္ထေရဝတ္ထု
၃၈၇။ ဒိဝါ တပတိ အာဒိစ္စော၊ ရတ္တိမာဘာတိ စန္ဒိမာ။
သန္နဒ္ဓေါ ခတ္တိယော တပတိ၊ ဈာယီ တပတိ ဗြာဟ္မဏော။
အထ သဗ္ဗမဟောရတ္တိံ၊ ဗုဒ္ဓေါ တပတိ တေဇသာ။
ဤတရားဒေသနာတော်ကို ဘုရားရှင်သည် သာဝတ္ထိပြည် ပုဗ္ဗာရုံကျောင်းတော်၌ သီတင်းသုံးနေတော်မူစဉ် ဘုရင်, ကာဠုဒါယီထေရ် လရောင်, နေရောင်တို့ထက် ဘုရားရှင်၏ အရောင်တော်သာ အတောက်ပဆုံးဟု လျှောက်ထားသော အရှင်အာနန္ဒာကို အကြောင်းပြု၍ ဟောတော်မူသည်။
ဒေသနာတော်အဆုံး၌ များစွာသော ပုဂ္ဂိုလ်တို့ သောတာပန်စသည်ဖြစ်ကြသည်။
အနက်
အာဒိစ္စော၊ နေမင်းသည်။ ဒိဝါ၊ နေ့အခါ၌သာလျှင်။ တပတိ၊ တင့်တယ်၏။ စန္ဒိမာ၊ လမင်းသည်။ ရတ္တိံ၊ ညဉ့်အခါ၌သာလျှင်။ တပတိ၊ တင့်တယ်၏။ ခတ္တိယော၊ မင်းသည်။ သန္နဒ္ဓေါ၊ မင်းမြောက်တန်ဆာဆင်မှသာလျှင်။ တပတိ၊ တင့်တယ်၏။ ဗြာဟ္မဏော၊ ရဟန္တာပုဂ္ဂိုလ်သည်။ ဈာယီ၊ ဈာန်ဝင်စားမှသာလျှင်။ တပတိ၊ တင့်တယ်၏။ အထ၊ စင်စစ်သော်ကား။ ဗုဒ္ဓေါ၊ ဘုရားရှင်သည်။ တေဇသာ၊ သီလ ဂုဏ ပညာ ပုည ဓမ္မဟူသော တန်ခိုးတော်ဖြင့်။ သဗ္ဗမဟောရတ္တိံ၊ အလုံးစုံသော နေ့ညဉ့်ပတ်လုံး။ တပတိ၊ တင့်တယ်၏။
စကားပြေ
နေမင်းသည် နေ့အခါ၌သာ, လမင်းသည် ညဉ့်အခါ၌သာ မင်းသည် မင်းမြောက်တန်ဆာဆင်မှသာ ရဟန္တာအရှင်သည် ဈာန်ဝင်စားမှသာ တင့်တယ်ကြ၍ ဘုရားရှင်သည် နေ့ရောညပါ အခါခပ်သိမ်း သီလ ဂုဏ ပညာ ပုည ဓမ္မဟူသော တန်ခိုးတော်ဖြင့် တင့်တယ်တော်မူ၏။
ဒိဝါ တပတိ အာဒိစ္စော—နေ့အခါ နေသည် ထွန်းလင်းတောက်ပ၏၊ ညအခါ သွားရာလမ်း မထင်ရှားပေ။
ရတ္တိမာဘာတိ စန္ဒိမာ—တိမ်တိုက်စသည်မှ လွတ်သော လသည် ညအခါ ထွန်းလင်းတင့်တယ်၏။ နေ့အခါ သွားရာလမ်း မထင်ရှားပေ။
သန္နဒ္ဓေါ ခတ္တိယော တပတိ—ရွှေ ငွေ ပတ္တမြား စသော ဆန်းကြယ်သော တန်ဆာတို့ဖြင့် ဆင်ယင်ပြီး လေးပါးသော စစ်သည်တော်များ ခြံရံမှသာလျှင် မင်းသည် ကျက်သရေရှိ၏။ မထင်ရှားသော အသွင်ရှိသော မင်းသည် ကျက်သရေ မရှိ။
ဈာယီ တပတိ ဗြာဟ္မဏော—ရဟန္တာသည် ဂိုဏ်းကို စွန့်ခွာ၍ ဈာန်ဝင်စားမှသာလျှင် ကြည်ညိုဖွယ်ရှိ၏။
ဗုဒ္ဓေါ တပတိ တေဇသာ—တေဇ အရ သီလတေဇ, ဂုဏတေဇ, ပညာတေဇ, ပုညတေဇ, ဓမ္မတေဇဟူသော တေဇငါးပါး ရ၏။ သီလတေဇဖြင့် ဒုဿီလတေဇကို, ဂုဏတေဇဖြင့် နိဂ္ဂုဏတေဇကို, ပညာတေဇဖြင့် ဒုပ္ပညတေဇကို, ပုညတေဖြင့် အပုညတေဇကို, ဓမ္မတေဇဖြင့် အဓမ္မတေဇကို နှိမ်နင်းပြီး နေ့ရော ညဉ့်ပါ အချိန်မရွေး အခါခပ်သိမ်း ဘုရားရှင်သည် တင့်တယ်တော်မူသည်။
ပါဠိစကားလုံး ဖွဲ့စည်းပုံ
အာဒိစ္စော = အာဘုသော ဒိပ္ပတီတိ အာဒိစ္စော။ အာ+ဒိပ်+ယ။ (ပကိုစပြု) အဒိတိယာ အပစ္စံ အာဒိစ္စော။ အဒိတိ+ဏျ။
သန္နဒ္ဓေါ = သန္နယှတီတိ သန္နဒ္ဓေါ။ သံ+နတ်+တ။
ခတ္တိယော = ခတ္တဿ အပစ္စံ ခတ္တိယော။ ခတ္တ+ဣယ။
အာနန္ဒတ္ထေရဝတ္ထုပြီး၏။
အရှင်သုဇနာဘိဝံသ၏ ဓမ္မပဒဂါထာနိဿယ
၂၆-ဗြာဟ္မဏဝဂ်
၅-အာနန္ဒတ္ထေရဝတ္ထု ပါဠိဂါထာ
သန္နဒ္ဓေါ ခတ္တိယော တပတိ, ဈာယီ တပတိ ဗြာဟ္မဏော၊
အထ သဗ္ဗမဟောရတ္တိံ, ဗုဒ္ဓေါ တပတိ တေဇသာ။
အာဒိစ္စော၊ နေသည်။ ဒိဝါ၊ နေ့အခါ၌သာ။ တပတိ၊ တောက်ပတင့်တယ်၏။ စန္ဒိမာ၊ လသည်။ ရတ္တိံ၊ ညဉ့်အခါ၌သာ။ အာဘာတိ၊ တောက်ပတင့်တယ်၏။ ခတ္တိယော၊ ရေမြေ့သနင်း, ပြည့်ရှင်မင်းသည်။ သန္နဒ္ဓေါ၊ တန်ဆာဆင်ယင်, လေးအင်စစ်တပ်, ဝန်းရံအပ်သည်။ (သမာနောဝ၊ ဖြစ်သော်သာ။ ဝါ၊ ဖြစ်မှသာ။) တပတိ၊ ၏။ ဗြာဟ္မဏော၊ မကောင်းမှုတို့ကို မျောစေပြီးသော ရဟန္တာသည်။ ဈာယီ၊ ဈာန်၂-ပါးဖြင့် ရှုပွားနေသည်။ ဝါ၊ ဈာန်ဝင်စားနေသည်။ (သမာနောဝ၊ သာ) တပတိ၊ ၏။ အထ၊ ထိုမှတစ်ပါး။ ဗုဒ္ဓေါ၊ သဗ္ဗညုဘုရားရှင်သည်။ သဗ္ဗံ၊ အလုံးစုံသော။ အဟောရတ္တိံ၊ နေ့ညဉ့်ပတ်လုံး။ တေဇသာ၊ သီလနှင့်ဂုဏ်, ပညာပုည, ဓမ္မမည်ခေါ်, တန်ခိုးတော်ဖြင့်။ တပတိ၊ တောက်ပတင့်တယ် တော်မူပါပေ၏။ (ပါ-၃၈၇) [ဤဂါထာသည် လောကီလောကုတ္တရာမင်္ဂလာ အားလုံးနှင့် မဆန့်ကျင်သော သဗ္ဗမင်္ဂလာဂါထာတော်ဖြစ်သည်(သံ၊ဋ္ဌ၊၂၊၂၂၆၊ သံ၊ဋီ၊၂၊၂၀၀)။]
အာနန္ဒတ္ထေရဝတ္ထုဂါထာနိဿယပြီးပြီ။